زندگی تجھ سے شکایت ہی کہاں تھی لیکن

زندگی تجھ سے شکایت ہی کہاں تھی لیکن
تیری تلخی، میرے لہجے سے عیاں تھی لیکن

کہہ نہ پائے دمِ رخصت کہ ملیں گے ہم، تم
کچھ تو خواہش پسِ اندازِ بیاں تھی لیکن

عذر بھی، شکوے، شکایت بھی مراسم میں رہے
اک محبت بھی کہیں دل میں نہاں تھی لیکن

ضبط ہر غم پہ کِیا، جھیل گیا ہر طوفاں
اک تری حسرتِ ناکام گراں تھی لیکن

خاک چھانی ہے مرے عزمِ سفر نے احسن
میری منزل میری آنکھوں سے نہاں تھی لیکن