سوچ سمندر تردے عمر گزار لئی

سوچ سمندر تردے عمر گزار لئی
دکھڑے جردے جردے عمر گزار لئی

اوہدی سانجھ تے پھر وی رہی اے غیراں نال
جس دا پانی بھردے عمر گزار لئی

کالی رات دے مکھ توں کالک دھوون لئی
چانن کردے کردے عمر گزار لئی

ساہواں والی پونجی دائ تے لاوندے رہے
جیون بازی ہردے عمر گزار لئی

لوکاں نوں اپڑاوندے رہے آں منزل تے
اپنی وچ سفر دے عمر گزار لئی

آیا نہ آرام نمانے زخماں نوں
مرہم دھردے دھردے عمر گزار لئی

رہ کے ککھاں دئی کلی وچ اسیں ملوک
پالے ٹھردے ٹھردے عمر گزار لئی