کیوں کرے کوئی بہاروں میں نگہبانی مری

کیوں کرے کوئی بہاروں میں نگہبانی مری
جا نہیں سکتی یہ خوئے چاک دامانی مری

کرلے جتنا ہوسکے تجھ سے ستم اے آسماں
رنگ لائے گی کبھی تو نالئہ سامانی مری

وسعت دل دیکھیے گر دیکھنا ہے آپ کو
ظاہری پردہ ہے شان تنگ دامانی مری

آستان دوست کے سجدوں پہ ہے ناژ عروج
کب کسی کے سامنے جھکتی ہے پیشانی مری

وہ تو اختر آئے تھے بہر علاج درد دل
بڑھ گئی کچھ اور بھی لیکن پریشانی مری