یاد توں مینوں کر دی ہو سیں

یاد توں مینوں کر دی ہو سیں
لمبے ہوکے بھردی ہو سیں

ہتھیں لیکاں ویکھ کے اکثر
آپنے آپ نال لڑدی ہوسیں

سوچ کے بیتے پل دیاں گلاں
جتی بازی ہردی ہوسیں

وقت چناں وچ سوہنی بن کے
کچ گھڑے تے تردی ہو سیں

بھر کے نیناں دے وچ ہنجو
بدلاں وانگوں وردی ہوسیں

زلفاں دے وچ پھل سجا کے
میریاں گلاں کردی ہوسیں

ویکھ بنیرے کاں نوں بیٹھا
بانہہ وچ گجرے بھردی سوسیں

ایویں بیٹھیاں بیٹھیاں اک دم
ساہواں توں وی ڈردی ہوسیں