گیارہ دسمبر پاکستان کرکٹ کے لیے بڑا دن ہو گا، احسان مانی

پاکستان کرکٹ بورڈ نے کئی برسوں کے بعد ملک میں ٹیسٹ کرکٹ کی بحالی کے موقع پر سری لنکا کے خلاف ہوم سیریز کے آغاز پر پاکستان اور سری لنکا کے دو سابق کپتانوں کو بطور خاص مدعو کیا ہے تاکہ ان کی خدمات کا اعتراف کیا جا سکے۔

اپنے وقت کے عظیم بلے باز اور سابق کپتان جاوید میاندار اور سری لنکا کے سابق کپتان بندولا وارناپورا راولپنڈی میں 11 دسمبر سے شروع ہونے والے ٹیسٹ میچ میں مہمان خصوصی ہوں گے۔

میانداد اور وارنا پورا نے پاکستان اور سری لنکا کے درمیان کھیلے جانے والے اولین ٹیسٹ میچ میں اپنی اپنی ٹیموں کی قیادت کی تھی۔ یہ میچ کراچی کے نیشنل کرکٹ سٹیڈیم میں مارچ 1982 میں کھیلا گیا تھا۔ پاکستان نے یہ میچ 204 رنز سے جیت لیا تھا۔

دونوں اطراف کے سابق کپتان 10 دسمبر کو سیریز کی ٹرافی کے ساتھ ایک خصوصی فوٹو شوٹ کرائیں گے اور پھر 11 دسمبر کو کھیل کے پہلے دن کھانے کے وقفے کے دوران ان کے اعزاز میں ایک خصوصی تقریب ہو گی۔

پاکستان کرکٹ بورڈ کے چیرمین احسان مانی نے ایک بیان میں دونوں مہمانوں کی جانب سے اس تقریب کے لیے دعوت قبول کرنے پر ان کا شکریہ ادا کیا ہے۔ ان کے بقول پاکستان اور اس کی کرکٹ کے دنیا بھر میں مداحوں کے لیے یہ دن بہت معنی رکھتا ہے۔

’’ گیارہ دسمبر کا دن پاکستان کی کرکٹ کی تاریخ میں ایک بڑا دن ہو گا اور اس دن بندولا ورناپورا اور جاوید میانداد کو ہمارے میدانوں میں ایک ساتھ دیکھنا بہت بڑی بات ہے۔ وہ کرکٹ کے بڑے نام ہیں جہنوں نے کھیل کے لیے بے مثال خدمات انجام دی ہیں‘‘۔


 

WATCH LIVE NEWS

Samaa News TV PTV News Live Express News Live 92 NEWS HD LIVE Pakistan TV Channels

Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.