کیویں؟ - سرائیکی

اپنا حال سناواں کیویں
دل دے پھاڑ ڈکھاواں کیویں
تو تاں بوہے بند کر ڈتن
تیڈے گھر ہن آواں کیویں
تو تاں آکھیں بھل ونج میکوں
تیڈی یاد مٹاواں کیویں
میں تاں اجڑا پجڑا بیٹھاں
خوشی دے گاون گاواں کیویں
موڑ ڈتے نی مندری چھلے
میں اے بھار وی چاواں کیویں
ڈس تے سہی تو رسا کیوں ھیں
ڈس تیکوں میں مناواں کیویں
تیڈے کہیں نے کن بھرے ہن
تیکوں میں سمجھاواں کیویں
ساڑ نہ چھوڑے میڈے گھر کوں
لگی بھا مسماواں کیویں
ڈيکھ کے امن کنڈ چا کریں
تیکوں گل نال لاواں کیویں