Chalna Tum ko

Pyas Ke Aalam Mein Kya Bolun Mujh Ko Kaisa Lagta Hai
Ek Qatra Bhi Is Dum Adil Dariya Jaisa Lagta Hai

Sookhe Paton Ki Aahat Ab Bhi Mujh Ko Chonkati Hai
Yaad Hai Mujh Ko Un Per Chalna Tum Ko Acha Lagta Hai

Mein To Apne Aap Ko Aksar Ye Samjhata Rehta Hon
Tu Sab Kuch Hai Phir Bhi Akhir Tu Mera Kya Lagta Hai

Itni Mudat Se Aankhon Mein Khwab Nahin Utra Koi
Ke Ab Sapna Bhi Dekhoon To Mujh Ko Sapna Lagta Hai

Tum Kya Mere Pyar Ki Shiddat Paimano Se Naapo Ge
Pyar Mein Jitna Bhi Karta Hoon Mujh Ko Thora Lagta Hai

Honton Ki Muskaan Se Tu Ne Dard Chupaya Hai Lekin
Aankhon Ki Surkhi Se Tu Bhi Dil Se Roya Lagta Hai

Apni Ankhon Mein Khwabon Ke Loag Sajaye Bethay Hain
Khwabon Ka Sodagar Phir Se Shehar Mein Aya Lagta Hai

Dil Ke Behlane Ko Sab Se Kehta Hoon Tanha Khush Hoon
Sach Poocho To Tanha Rehna Kis Ko Acha Lagta Hai

Palkon Ki Barhon Pe Jo Tum Ashk Sajaye Bethe Ho
Dil Mein Yaadon Ka Phir Koi Jhonka Aya Lagta Hai

Jaise Bheer Mein Bacha Koi Gum Ho Jata Hai Adil
Tum Jab Saath Nahin Hote Ho Mujh Ko Aesa Lagta Hai