Merii Judaaiiyon Se Vo Milkar

Merii Judaaiiyon Se Vo Milkar Nahiin Gayaa
Uske Baghair Main Bhii Ko’ii Mar Nahiin Gayaa

Duniyaa Men Ghuum-Phir Ke Bhii Aise Lagaa Mujhe
Jaise Main Apnii Zaat Se Baahar Nahiin Gayaa

Kyaa Khuub Hain Hamaarii Taraqqii-Pasandiyaan
Ziine Banaa Liye Ko’ii Upar Nahiin Gayaa

Jugraaphiye Ne Kaat Diye Raaste Mere
Taariikh Ko Gilaa Hai Ke Main Ghar Nahiin Gayaa

Aisii Ko’ii Ajiib Imaarat Thii Zindagii
Baahar Se Jhaanktaa Rahaa Andar Nahiin Gayaa

Sab Apne Hii Badan Pe “Muzaffar” Sajaa Liye
Vaapas Kisii Taraf Ko’ii Patthar Nahiin Gayaa