بھلا کیسی محبت ہے

کتابوں میں یہ لکھا ہے
بزرگوں کا یہ کہنا ہے
محبت ایسی خوشبو ہے
جو ہر سو پھیل جاتی ہے
یہ چہرے جگمگاتی ہے
یہ آنکھوں کو رلاتی ہے
محبت دل میں بس جائے
تو خونِ دل بہاتی ہے
چھپانا گر کوئی چاہے
تو ناکامی دکھاتی ہے
یہ سنتے ہی مرے دل میں
یکایک یہ خیال آیا
ہمیں پھر اپنے خالق سے
بھلا کیسی محبت ہے
نہ چہروں سے عیاں ہے جو
نہ آنکھوں میں نہاں ہے جو
نہ خونِ دل بہاتی ہے
نہ آنکھوں کو رلاتی ہے
ہمارے دل میں اس رب کی
بھلا کیسی محبت ہے