عروسِ چمن

اے عروسِ چمن،نازنیں گلبدن
تو ہے غنچہ دہن، رشکِ سر و سمن

سادگی ، بھولپن، کمسن و سیم تن
ہے غضب کی چلن، قاتل و راہزن
ٍٍٍ
ہے حسیں دلربا،تیری ہر اک ادا
سب ہیں تجھ پہ فدا، تو ہے مشکِ ختن
ٍٍ
ناز و انداز میں، چشمِ غماز میں
سوز میں، ساز میں،کیا تیرا بانکپن

سوچتا ہوں مگر، ہوں میں بندہ بشر
کر نہ جائے اثر، زلفِ توبہ شکن

پایا قرآن سے، رب کے فرمان سے
بڑھ کے شیطان سے، تیرا مکر و فتن

برق ہے یا شرر، الاماں، الحذر
سخت ہے پُر خطر، تیرا طرزِ سخن

خسروی، سروری، عاشقی، دلبری
چار دن کی تری، پھر تو دشت و دمن

مرد ہوں یا کہ زن، سب زمیں میں دفن
پھر نہ عضوِ بدن، پھر نہ تارِ کفن

ایک ہی اب جتن، رات دن کی لگن
ہیں فدا جان و تن، تجھ پہ اے ذوالمنن