عشق نظریہ عشق نظر بھی

عشق نظریہ عشق نظر بھی عشق نظر کا نظارہ
عشق میں سب کچھ پایا عشق میں سب کچھ وارا

عشق میں لاحاصل بھی حاصل، سود وزیاں برابر
عشق میں یہ دل جیتا ہے عشق میں یہ دل ہارا

عشق بگاڑے عشق سنوارے عشق سمیٹےعشق بکھیرے
عشق نے جوڑا عشق نے توڑا عشق نے کیا پارا پارا

عشق ہی اپنا ہنسنا رونا، عشق ہی پانا کھونا ہے
عشق میں جیتے مرتے ہوئے گزرا یہ جیون سارا

عشق ہمارا جگنا سونا عشق اوڑھنا عشق بچھونا
عشق ہمارا دانہ پانی عشق پہ کیا دن رات گزارا

عظمٰی عشق سے بہتر کوئی منزل کوئی راہ نہیں
عشق سفر کے ہر راہی نے سفر در سفر یہی پکارا