محشر بداماں

تم اتنی حسیں ہو تم اتنی حسیں ہو
حقیقت میں تم تو ثریا جبیں ہو

میں کہہ دوں اگر کچھ تمہیں بھی یقیں ہو
تمہیں پیار کرنےکو جی چاہتا ہے

لبوں پر ہے رقصاں گلابی گلابی
نگاہوں کی جنبش شرابی شرابی

تمہارا یہ چہرہ کتابی کتابی
تمہیں پیار کرنے کو جی چاہتا ہے

تمہاری نگاہیں پیام محبت
خموشی تمہاری کلام محبت

سلامت تمہیں سے ہے نام محبت
تمہیں پیار کرنے کو جی چاہتا ہے

تمہارا تجمل قیامت قیامت
تمہاری تجلی حقیقت حقیقت

تمہارے اشارے محبت محبت
تمہیں پیار کرنے کو جی چاہتا ہے

تمہارا سراپا ہے محشر بداماں
مجسم ہو غارت گر دین و ایماں

نہ پوچھو میرے دل کی حسرت میری جاں
تمہیں پیار کرنے کو جی چاہتا ہے

تمہارا تبسم گلوں کی جوانی
تمہارا ترنم مئے ارغوانی

تمہارا تکلم کتاب معانی
تمہیں پیار کرنے کو جی چاہتا ہے

تمہاری نظر کیف و مستی لئے ہے
شراب محبت کے ساغر پئے ہے

یہ افضل کا دل بھی ارادہ کئے ہے
تمہیں پیار کرنے کو جی چاہتا ہے