چوگا اک تے کہاتاں دو

اوہدے بل دے تل تے
دو زلفاں دے سائے نے
دل پنچھی دی حالت مندی
چوگا اک تے کہاتاں دو
۔۔۔۔۔۔۔۔۔۔۔
ملاں تے قاضی چپ چپیتے
رل بیٹھے نے
ایدھر عشق نمان
کیہ کریئے
پکا اک تے کچے دو
۔۔۔۔۔۔۔۔۔۔۔
تیرے مکہڑے تے ڈگیاں
دو زلفاں نے
میرے چت دا چانن کھسیا
ہن حیات وچ رہ گئے
دن اک تے راتاں دو
۔۔۔۔۔۔۔۔۔۔۔۔۔
چن ورگا ساقی
غافل کیوں بیٹھا اے
بھر اک جام پھڑا
کون ایڈیکے
کل ملسن
پیالے دو
۔۔۔۔۔۔۔۔۔۔۔۔۔۔
اوہدیاں مست اکھاں چوں
پئی شراب عشق دی ڈھلے
رنگ نشہ
شراب اکو دا
بھرے پیالے دو

میں کیہ آں
میرے جئے کئی ہور ہزاراں
ابرواں دی تلوار تے
کٹ پورے ہوئیے
اوہدیاں مست اکھاں وچ
میم اک تے لاماں دو
۔۔۔۔۔۔۔۔۔۔۔
ملن دا وعدہ کرکے
اوہ ملدا نئیں
دنیا وچ‘
ایہ ان ہونی ویکھی
مرد اک
بلاں وچ کلاماں دو
............
مینوں در اپنے دا
کتا من‘
کمینا چاکر آکھ
دو ناواں وچ
فرق ناں رائی
نوکر اک تے سرناویں دو
۔۔۔۔۔۔۔۔۔۔۔۔۔۔