“مجھے تم سے محبت ہے“یہ کہنا بھول جاتا ہے

گزرتا وقت پلکوں کو جھپکنا بھول جاتا ہے
تم آتے ہو نظر تو دل دھڑکنا بھول جاتا ہے

چمن میں ہر طرف تیرے ہی جلوے رقص کرتے ہیں
صبح روشن میں تاروں کو چمکنا بھول جاتا ہے

ہزاروں خواہشیں تم پر عیاں کرتا ہے دل میرا
“مجھے تم سے محبت ہے“ یہ کہنا بھول جاتا ہے

کبھی آتش تمنا کی دبی رہتی ہے سینے میں
کبھی اشکوں کو آنکھوں سے چھلکنا بھول جاتا ہے

کچھ ایسا کر دکھاتا ہے تیرے الفاظ کا جادو
کہ وحشت کو گھڑی پل میں سمٹنا بھول جاتا ہے