بینکنگ فراڈ: سابق بینک منیجر کو 28 سال قید کی سزا

کوئٹہ کی مقامی عدالت نے کروڑوں روپے کی خورد برد کا جرم ثابت ہونے پر نجی بینک کے سابق برانچ منیجر کو 28 سال قید کی سزا سنادی۔ بینکنگ فراڈ کا مقدمہ وفاقی تحقیقاتی ادارے ایف آئی اے کی جانب سے دائر کیا گیا تھا۔

مقدمے کے مطابق مسلم کمرشل بینک حب چوکی برانچ کے سابق منیجر سید ابن الحسن نقوی نے تین سال قبل لسبیلہ انڈسٹریل اسٹیٹ ڈیولپمنٹ اتھارٹی (لیڈا) کے فنڈز میں 2 کروڑ روپے کی بدعنوانی کی تھی۔

ایف آئی اے کے مطابق لیڈا کی جانب سے بینک میں فکسٹ ڈیپازٹ کی غرض سے 2 کروڑ روپے جمع کرائے گئے تھے تاہم ملزم نے جعلی دستاویزات فراہم کرکے رقم بینک میں جمع کرانے کی بجائے لوٹ لی تھی۔

ایف آئی اے بلوچستان کے ڈائریکٹر عبدالحمید بھٹو کی سربراہی میں ایف آئی اے ٹیم نے ملزم کیخلاف چالان اور شواہد بینکنگ کورٹ کوئٹہ میں جمع کرائے تھے۔

بینکنگ کورٹ کوئٹہ کے جج منیر احمد مری نے گزشتہ روز جرم ثابت ہونے پر سید ابن الحسن نقوی کو مجموعی طور پر 28 سال قید بامشقت اور ایک کروڑ روپے جرمانے کی سزا سنادی، جرمانے کی عدم ادائیگی کی صورت میں مجرم کو مزید 3 سال اور ایک ماہ کی قید کاٹنا ہوگی۔


 

WATCH LIVE NEWS

Samaa News TV PTV News Live Express News Live 92 NEWS HD LIVE Pakistan TV Channels

Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

74